Ai Aconsiadus provinziai dla provinzia da
Balsan
Mendranzes tl' Austria
Nos
damanun solidarité con la mendranza slovena tla
Ciarencia! |
|
|
Balsan, ai 19 de dezëmber
2001
Stimades
aconsiadësses, stimês aconsiadus,
ala seziun de
Südtirol dla Lia por i popui manacês i
parentëiera dassënn de co che cërtli de man
dërta se lascia sö y tiza cuntra la mendranza slovena
tl'Austria. Al n'é nia da crëie co che le sorastant
dla Ciarencia Jörg Haider manacia publicamonter da tó
jö i dërc dla mendranza y empormët da jì
cuntra la costituziun. Mâ dër püc politics
austriacs à cina cëgn tut posiziun por defëne la
medranza slovena. Le canzelier Wolfgang Schüssel à
bëgn detlaré da sté tla cuestiun dles tofles
toponomastiches bilinguales sön la pert dla Curt
costituzionala y de so presidënt, refodan la ghiranza de
Haider che chësc dais les dimisciuns. An à indere
albü dër püces parores de solidarieté con
la mendranza slovena tla Ciarencia, cuntra chëra che al
vëgn tizé.
La mendranza
slovena tla Ciarencia é por la politica de assimilaziun de
tröc agn smendrida dassënn, plü avisa da 43.000
apartenënc dal 1939 a atualmënter zirca 15.000. Le
politologh Anton Pelinka à porchël baié de na
"eliminaziun demografica" dles mendranzes
tl'Austria.
Le sorastant dla
Ciarenca Jörg Haider recatëia la mendranza slovena. A
plü tofles te dui lingac, desco scrit dant dla Curt
costitizionala, ôl respogne con l'aboliziun de scolines y
scores bilinguales todesch-slovenes y con manco sovenziuns por la
mendranza slovena. L'intimidaziun dai apartenënc dla
mendranza slovena fej pert dla strategia ince dal movimënt
nazionalist todësch Kärntner Heimatdienst. I
Freiheitliche y le Heimatdienst laóra con le sostëgn
ascognü ince dales righes dla ÖVP y dla SPÖ cuntra
la populaziun slovena. Haider mët söa ativité
politica tl spirit dla pulizia etnica y ciapa sot dërc dla
mendranza y la costituziun democratica. Haider ô tó
jö dërc costituzionai con referendum - ô
dì con na campagna de sënn cuntra la mendranza
slovena - y al ô ince tó demez vicari dla Curt
costituzionala. Chësta è na forma de
golpe.
Al é da
dodé che la politica de Südtirol n'á
ciamó dit nia sön chësta politica de carater
fascist. Mo tlo da nos scuton bëgn plü gonot can che la
politica antiminoritara è todëscia. Nos se damanun
dal Consëi provinzial y dales fraziuns da detlaré
söa solidarieté con la mendranza slovena tla
Ciarencia. Damané dërc mâ por se instësc
n'à ciamó nia da fà con respet por les
mendranzes - mâ por se instësc damana düc.
Madoranza politica y respet por les mendranzes àn
pormó canche an s'impegnëia ince por i dërc dai
atri.
Con de bi
salüc
Lia por i popui
manacês
Vëiga
ince:
Mené chësta plata a n
amich